Елде Қазақстанның рейтинг агенттігі құрылуы мүмкін. Бұл туралы Қаржы нарығын реттеу және дамыту агенттігінің төрағасы Мәдина Әбілқасымова «Рейтингтік қызмет туралы» заң жобасын таныстырған кезде айтты.
Сондай-ақ Мәжіліс қарауына «Қазақстан Республикасының кейбір заңнамалық актілеріне рейтингтік қызмет мәселелері бойынша толықтырулар енгізу туралы» заң жобасы ұсынылды.
«Тәуелсіз ұлттық рейтингтік бағалау институты ретінде Қазақстанның рейтингтік агенттігі құрылады. Ұлттық Банк, халықаралық рейтингтік агенттік және басқа да қаржы ұйымдары акционері болады», – деді Әбілқасымова.
Агенттікке халықаралық және шетелдік рейтингтік агенттіктерді тану, бақылау және мойындауды қайтарып алу, сондай-ақ рейтингтік қызмет туралы заңнама талаптарының сақталуын бақылау өкілеті беріледі.
Нарыққа кіруге рұқсат беру үшін халықаралық және шетелдік рейтинг агенттіктерге бірнеше талап қойылады. Оның ішінде кемінде 5 жыл тәжірибесі, меншікті капитал деңгейі жеткілікті, тексеруден өткен әдіснамасы болуы қажет.
«Қазақстанның рейтингтік агенттігі үшін жарғылық капитал шамамен 10 млрд теңгені құрайды деп болжанған», – деді Әбілқасымова.
Қазір Қазақстан аумағында Standard & Poor’s, Moody’s және Fitch Ratings халықаралық агенттіктері рейтинг береді. Сонымен қатар шетелдік рейтингтік агенттіктерді аккредиттеу арқылы ЭКСПЕРТ РА мен АКРА рейтинг қалыптастырады.
