АҚШ Президенті Дональд Трамп пен Иранның жоғарғы басшылығы арасындағы кезекті ақпараттық текетірес басталды. Трамп Иранның ішкі саяси жағдайы мен стратегиялық бақылау туралы өткір мәлімдеме жасаса, Тегеран бұған ел ішіндегі бірлік туралы ортақ жауап қайтарды.
Президент Дональд Трамптың ұстанымы:
«Иранға өздерінің көсемі кім екенін түсіну өте қиын болып тұр! Олар жай ғана білмейді! Ішкі тартыс майдан даласында оңбай жеңіліп жатқан «радикалдар» мен мүлдем момын емес (бірақ құрметке ие болып жатқан!) «момынсығандар» арасында жүріп жатыр. Бұл нағыз ақылға сыйымсыз нәрсе!
Біз Ормұз бұғазын толық бақылауда ұстап отырмыз. АҚШ Әскери-теңіз күштерінің рұқсатынсыз ешбір кеме ол жерге кіре де, шыға да алмайды. Иран КЕЛІСІМГЕ келгенше, бұғаз «тарс жабық» болады!!! Осы мәселеге көңіл бөлгендеріңізге рақмет» – деп мәлімдеді АҚШ басшысы.
Иран билігінің жауабы:
Көп ұзамай Иран билігінің үш тармағының басшылары X (Twitter) желісіндегі аккаунттарында ISNA агенттігі арқылы бірлескен мәлімдеме жариялады:
«Иранда ешқандай жікке бөліну мен келіспеушілік жоқ. Біз бәріміз – Иран халқы мен революционерлер ел басшылығымен және мемлекетпен бірге иық тіресіп тұрмыз. Біз сионистік режимнің «революция» деп аталатын ұйымының көптеген лидерлерін жасаған істеріне өкіндіретін боламыз. Біздің Құдайымыз бір, көсеміміз бір, халқымыз бір және жолымыз бір. Ол жол – өмірден де қымбат Иранның жеңісі»,- делінген Тегеранның ресми жауабында.
Айта кетейік, BBC-дің мәліметінше, қазір ашық соғыс қимылдарының орнына Ормұз бұғазында «кемелерді қоршау соғысы» жүріп жатыр. Екі жақ та бір-бірінің сауда кемелерін ұстап, басып алу арқылы күш көрсетіп отыр. Әлемдегі ең маңызды су жолдарының бірінде жағдай өте шиеленісті, кез келген сәтте бақылаудан шығып кетуі мүмкін
