Фуджайрадағы оқиғалар Ормұз бұғазында БАӘ-нің мемлекеттік мұнай компаниясына тиесілі танкерге шабуыл жасалды деген ақпаратпен тұспа-тұс келді. Көршілес Катар бұл шабуылды қатаң айыптап, оны халықаралық құқық пен теңізде еркін жүзу қағидатын өрескел бұзу деп бағалады және бұғазды сөзсіз ашуға шақырды. Сол арада БАӘ әуе шабуылына қарсы қорғаныс жүйелері зымыран қаупіне тойтарыс беріп жатқанын хабарлады. Ұлттық төтенше жағдайлар басқармасы тұрғындарға ескерту жасап, қауіпсіз жерде қалуға шақырды. Сондай-ақ, Оңтүстік Корея шенеуніктері БАӘ суларында тұрған жүк кемесіне зымыран тиіп, соның салдарынан жарылыс болған болуы мүмкін екенін алға тартты.
Біріккен Араб Әмірліктері жаңа мәлімдеме жасап, бүгінгі соққылар үшін Иранға «толық жауапкершілік» артатынын жеткізді. Мәлімдемеде бұл шабуылдар қауіпті жағдайды ушықтыру және халықаралық құқық пен БҰҰ Жарғысын бұзу болып табылатыны айтылған. Сондай-ақ, БАӘ халықаралық құқыққа сәйкес осы шабуылдарға жауап берудің толық әрі заңды құқығын өзінде қалдыратынын хабарлады. Ал Иранның мемлекеттік телеарнасы аты аталмаған жоғары лауазымды әскери шенеунікке сілтеме жасап, «Иран БАӘ-ге соққы беруді жоспарламағанын» жеткізді. Әзірге Иранның ресми тұлғаларынан басқа пікір түскен жоқ.
Эль-Фуджайрадағы өрттен кейін Brent мұнайының бағасы 115 доллардан асты
Бизнес-тілші Бен Кингтің хабарлауынша, бүгін мұнай нарығында баға қатты құбылды. БАӘ-дегі дрон шабуылдары туралы ақпараттан кейін Brent маркалы мұнай бағасы күндізгі максимумға жетті. Эль-Фуджайрадағы негізгі мұнай портына жасалған шабуылдан соң баға 5%-ға өсіп, барреліне 115 доллардан асты. Фуджайра БАӘ-нің шығыс жағалауында, Ормұз бұғазының сыртында орналасқан. Абу-Даби кен орындарынан келетін құбыр осы Фуджайраға жетеді, бұл бұғаз жабылған күннің өзінде мұнайды танкерлерге тиеп, әлемдік нарыққа шығаруға мүмкіндік береді. Күннің басында Иран әскерилері америкалық эсминецке шабуыл жасады деген ақпарат тарағанда мұнай бағасы 114 долларға жеткен еді. Кейін АҚШ өз кемелеріне зақым келмегенін мәлімдегенде, баға қайта түсті.
Мұнай-өнеркәсіп аймағындағы соққылар мен жарылыстар
Ирандық дрон шабуылынан кейін Фуджайра портында ірі өрт шығып, оны сөндіруге азаматтық қорғаныс топтары жұмылдырылды. Қалалық баспасөз қызметінің мәліметінше, Фуджайраның мұнай-өнеркәсіп аймағындағы (FOIZ) соққыдан Үндістанның үш азаматы орташа ауырлықтағы жарақат алып, ауруханаға жеткізілді. Бұл аймақ – Таяу Шығыстағы ең үлкен мұнай қоймалары орналасқан маңызды энергетикалық орталық. Сонымен қатар, БАӘ Қорғаныс министрлігі Ираннан ұшырылған үш зымыранды атып түсіргенін, ал төртіншісі теңізге құлағанын мәлімдеді. Тұрғындар естіген жарылыс дауыстары осы зымырандарды аспанда жоюға байланысты болған.
Еске сала кетейік, АҚШ президенті Дональд Трамп Ормұз бұғазында қалып қойған кемелерді құтқару операциясы басталғанын жариялаған болатын.
