Қырғызстан премьер-министрі Әділбек Қасымәлиев Ресейге қарсы шектеулерді «айналып өтуге қатыспайтынын» мәлімдеді. Оның айтуынша, Қырғызстан ЕО, АҚШ және Ұлыбританияның санкциялық тізімдеріне енген жергілікті банктерді тексеру үшін халықаралық аудиторлық компанияларға жүгінген. Қырғызстан батыс елдері Ресейге енгізген сауда шектеулерін айналып өтуге көмектеспейді, деп мәлімдеді елдің үкімет басшысы Әділбек Қасымәлиев.
«Біз шектеулерді айналып өтуге қатыспайтынымызды үнемі айтып келеміз. Бірақ сонымен бірге біздің Ресеймен тығыз қарым-қатынасымыз бар. Онда біздің мигранттар жұмыс істейді, ол жақтан ақша аударымдары түседі»,- деді Қасымәлиев.
Ол сондай-ақ Еуроодақтың Қырғызстанға қарсы санкцияларды айналып өтумен күресу құралын қолдану туралы шешіміне түсініктеме берді. Бұл механизм ЕО-ның сәуір айының соңында Ресейге қатысты қабылдаған 20-шы санкциялар пакеті аясында іске қосылды. Қырғызстанға кез келген сандық бағдарламалық басқаруы (СББ) бар жабдықтар мен радиоаппаратураларды экспорттауға тыйым салынды. ЕО бұл механизмді Қырғызстанның Ресейге жекелеген жабдықтардың экспортын болдырмау талаптарын «жүйелі және бірнеше рет сақтамауына» байланысты іске қосқанын мәлімдеді.
Қасымәлиевтің айтуынша, Қырғызстанға халықаралық санкциялар салынбаған, ал ЕО шектеулері тек тауардың екі түрін жеткізуге ғана қатысты.
Қырғызстан СІМ бұған дейін елге қатысты санкцияларды айналып өтуге қарсы механизмнің қолданылуына байланысты өкініш білдірген болатын. Ведомство «қырғыз тарапының ұстанымы ескерусіз қалғанын» және мұндай «біржақты шешімдер сенім атмосферасына нұқсан келтіретінін» мәлімдеді.
Еске сала кетейік, Еуропа Қырғызстаннан санкцияны айналып өтіп Ресейге тауар тасуды тоқтатуды талап еткен болатын.
