Биылғы «Онлайн Құрбан айт» жобасы аясында құрбандыққа шалынатын мал бағасы Қазақстанның әр өңірінде айтарлықтай ерекшеленеді. Kursiv Media-ның Қазақстан мұсылмандары діни басқармасы деректеріне жасаған талдауы елдегі ұсақ және ірі қара мал нарығындағы өңірлік диспропорцияны анық көрсетіп отыр.
Ең қымбат қой бағасы батыс және оңтүстік аймақтарда тіркелсе, ірі қара құны бойынша Маңғыстау облысы көш бастап тұр.
Ұсақ мал нарығы: Қой мен ешкі бағасы
Құрбандыққа ең көп шалынатын қой бағасы ел бойынша 100 000 теңгеден басталып, 150 000 теңгеге дейін жетеді:
Ең қымбат қой (150 000 тг) Атырау, Қызылорда, Ұлытау облыстары және Шымкент қаласында. Орташа баға (120 000 – 125 000 тг): Астана мен Алматы қалаларын қосқанда, елдің басым көпшілік аймақтарында (Ақмола, Ақтөбе, Алматы, Жамбыл, Жетісу, Қарағанды, Павлодар, СҚО, Түркістан, ШҚО) тіркеліп отыр. Ең қолжетімді қой (100 000 тг) Абай, Батыс Қазақстан және Қостанай облыстарында.
Ешкі бағасы 55 000 теңге (Павлодар облысы) мен 100 000 теңге (Қызылорда облысы) аралығында құбылады. Айта кетерлігі, Ақмола, Солтүстік Қазақстан облыстары мен Астана қаласында онлайн құрбандық үшін ешкі қарастырылмаған.
Ірі қара және түйе: Аймақтағы ерекшеліктер
Ірі қара мал (сиыр/бұқа) бағасындағы айырмашылық шамамен 315 мың теңгені құрайды:
Рекордтық көрсеткіш: Маңғыстау облысында ірі қара құны 945 000 теңгеге жеткен. Одан кейінгі орында Ақмола, Қарағанды облыстары және Астана қаласы (875 000 теңге). Төменгі шек: Ақтөбе, БҚО, Түркістан және Ұлытау облыстарында ірі қараны 630 000 теңгеге шалуға болады.
Түйе шалу мүмкіндігі еліміздің барлық өңірінде бірдей ұсынылмаған. Бұл қызмет тек 7 өңірде (Ақтөбе, Атырау, Жамбыл, Жетісу, Қызылорда, Маңғыстау және Түркістан облыстары) қолжетімді. Осы өңірлердің барлығында түйе бағасы бірыңғай – 1 120 000 теңге болып бекітілген.
Еске сала кетейік, Астанада 27-29 мамыр аралығында өтетін Құрбан айт күндері құрбандық шалынатын арнайы орындар белгіленді
