12 тамыздағы сауда қорытындысында KASE индексі 0,59%-ға өсіп, 8 044,85 пунктке жетті. Индекстің өсуіне ең үлкен үлесті Kaspi.kz акциялары қосты. Осылайша KASE индексі тарихи максимумды жаңартты.
Сауда көшбасшысы – Kaspi.kz. Компания акциялары 3,44%-ға қымбаттап, 46 545 теңгеден жабылды. Бұл индекс құрамындағы қағаздар арасындағы ең жоғары өсім болды.
«Қазатомөнеркәсіп» акциялары 0,50%-ға, Bank CenterCredit 0,40%-ға өсті. Halyk Bank пен «ҚазТрансОйл» қағаздары тиісінше 0,28% және 0,27% қымбаттады.
Air Astana мен «ҚазМұнайГаз» акцияларындағы қозғалыс әлсіз болды – өсім 0,07% және 0,01%-ды құрады.
Қазақтелеком аутсайдер болды
Арзандаған акциялар арасында ең үлкен өзгеріс «Қазақтелекомда» байқалды. KZTK қағаздары 0,73%-ға арзандап, 44 250 теңгеден жабылды.
KEGOC акциялары 0,27%-ға, Kcell қағаздарының құны 0,11%-ға арзандады.
Жалпы алғанда, индекс құрамындағы он акцияның жетеуі қымбаттады. Соның ішінде Kaspi.kz-дегі 3%-дан астам өсім KASE индексіне негізгі қолдау көрсетіп, индексті 8 мың пункттен жоғары деңгейге шығарды.
