Қазақстанда банктер депозиттердің пайыздық мөлшерлемелерін біртіндеп төмендете бастады, деп жазады Kursiv.Media. Бұған Ұлттық банктің базалық мөлшерлемені жұмсартуы әсер етіп отыр. Маусымда базалық мөлшерлеме 18%-дан 17%-ға, ал 24 шілдеде 16,75%-ға дейін төмендеді. Осының нәтижесінде банктер де салымшыларға ұсынатын табыстылықты қайта қарай бастады.
Бұл үрдіс жаз айларында анық байқалды. Бірқатар банк депозиттердің жекелеген түрлері бойынша мөлшерлемені төмендетті. Мәселен, Home Credit Bank тамыздан бастап кейбір жинақ депозиттері бойынша ЖТСМ-ды 20%-дан 19,6%-ға түсірді. ForteBank те тамыздың басынан жаңа депозиттік мөлшерлемелер енгізді.
10 тамыздағы дерек бойынша ақшаны толықтыруға және шешіп алуға мүмкіндік беретін депозиттер арасында ең жоғары ЖТСМ KZI Bank-те – 16,9%. Freedom Bank-тің 13 айлық «Копилка» депозитінде бұл көрсеткіш 16,73%, Home Credit Bank-тің «Простой» депозитінде 16,3%.
Alatau City Bank-тің Baytaq депозиті 16,08%, Freedom Bank-тің 12 айлық «Копилкасы» 15,95%, Eurasian Bank-тің Turbo депозиті 15,9% ЖТСМ ұсынады. ForteBank-те көрсеткіш 15,72%, Nurbank-те 15,7%. Halyk Bank пен Kaspi-дің еркін шешуге болатын депозиттерінде ЖТСМ шамамен 15%.
Жоғары пайызды ұсынушылар әлі де бар
Нарықта 19-20%-дан жоғары мөлшерлемелер әлі де бар. Алайда мұндай табыстылық көбіне жинақ депозиттерінде ұсынылады және ақшаны мерзімінен бұрын шешуге шектеу қойылады.
Егер Ұлттық банк базалық мөлшерлемені одан әрі төмендетсе, депозиттердің табыстылығы да біртіндеп азаюы мүмкін.
