20 тамызда KASE индексі қайтадан 8 мың пункттен төмен түсті. Сауда-сатық нәтижесінде индекс 50,14 пунктке немесе 0,63%-ға төмендеп, 7 962,69 пунктті құрады. Бір күн бұрын көрсеткіш 8 012,83 пункт болған. Индекстік акциялармен сауда көлемі бір күнде 2,1 есе өсіп, 846,7 млн теңгеге жетті.
20 тамыз күнгі саудада Қазақтелеком акциялары көш бастады. KZTK акциясының жабылу бағасы 44 100 теңгеден 44 750 теңгеге көтеріліп, Close-to-Close есептеуде 1,47% өсті. Одан кейін Kaspi.kz (+0,67%), ҚазМұнайГаз (+0,38% )және Halyk Bank (+0,19%) бағалы қағаздары оң нәтиже көрсетті. KASE-нің күнделікті шолуында да дәл осы төрт эмитенттің акциялары өсім көрсеткені атап өтілген.
Индекстегі қалған алты акция арзандады. KEGOC (−0,02%), Kcell (−0,07%), Банк ЦентрКредит ((−0,47%), Air Astana (−1,94%) құнды қағаздарының бағасы төмендеді. Пайыздар KASE жариялаған 20 және 19 тамыздағы нақты жабылу бағаларын Close-to-Close әдісімен есептеу арқылы шығарылды.
Бұл күнгі саудада «Қазатомөнеркәсіп» акциялары біршама құнсызданды. KZAP 32 998,98 теңгеден 31 810 теңгеге дейін түсіп, 3,6% жоғалтты. «ҚазТрансОйл» компаниясы да айтарлықтай төмендеп, 1 123,10 теңгеден 1 095 теңгеге немесе 2,50% түсті.
Нәтижесінде KASE индексіне кіретін он акцияның төртеуі өсіп, алтауы төмендеді. Индекс күн ішінде 8 059,78 пунктке дейін көтерілгенімен, сессия соңында сол күнгі минимум — 7 962,69 пунктте жабылды.
