«ҚазТрансОйл» 2026 жылғы қаңтар-қазанда магистральдық мұнай құбырлары жүйесі арқылы тасымалданған мұнай көлемін 38 млн 306 мың тоннаға жеткізді. Бұл туралы Kursiv.Media компанияның баспасөз қызметіне сілтеме жасап хабарлайды
Есепті кезеңде Өзен–Атырау–Самара магистральдық мұнай құбырының Атырау–Самара учаскесі арқылы 8 млн 373 мың тонна мұнай тасымалданды. Оның ішінде Новороссийск порты бағытына 3 млн 723 мың тонна, Усть-Луга порты бағытына 1 млн 958 мың тонна мұнай жөнелтілді.
Каспий құбыр консорциумы жүйесіне ауыстырып тиелген мұнай көлемі 3 млн 878 мың тоннаға жетті.
Ақтау портындағы «ҚазТрансОйл» нысандары арқылы танкерлерге 2 млн 922 мың тонна мұнай тиелді. Соның ішінде 1 млн 321 мың тоннасы Баку–Тбилиси–Жейхан мұнай құбыры бағытына жөнелтілді.
«ҚазТрансОйл» – Қазақстандағы ірі мұнай тасымалдаушы компания. Мемлекет компанияға «ҚазМұнайГаз» ұлттық компаниясы арқылы иелік етеді.
