Оқу-ағарту министрі Ғани Бейсембаев оқушылардың жыныстық тәрбиесіне мектептен гөрі ата-аналар көбірек жауапты деп санайды. Бұл туралы министр Үкімет сағатынан кейін өткен брифингте айтты.
Алматы облысында болған оқиға
Журналист брифинг барысында 14 жастағы оқушы қыздың домбырадан үйрететін ұстазбен жыныстық қатынасқа түскені туралы оқиға қоғамды дүр сілкіндіргенін айта келе, бұл мәселе министрлік тарапынан қалай реттелетінін сұрады.
«Біз бұл оқиғаға қатысты жедел әрекет еттік. Балаларды қорғау бойынша комитет істі өз бақылауына алды. Оқиға Алматы облысында тіркелген. Ер адам ешқашан мектепте сабақ бермеген. Десе де, бұл жағдай ешкімді жауапкершіліктен босатпайды. Тергеу жүріп жатыр», – деді министр.