Бүгін, 4 мамыр күні, Францияның Ле-Ман қаласында футзалдан UEFA Чемпиондар лигасының финалдық кездесуі өтеді. Қазақстандық жанкүйерлер үшін бұл тарихи сәт болғалы тұр: Алматылық «Қайрат» командасы финалда испаниялық «Пальма» клубымен күш сынасады. Ойын Астана уақытымен сағат 23:00-де басталады. Тікелей эфирде кездесуді Qazsport арнасы көрсетеді.
Жартылай финалдағы жеңіс
«Қайрат» жартылай финалда Испанияның «Картахена» клубын 3:2 есебімен тізе бүктіріп, жанкүйерлерін қуантқан еді. Бұл жеңіс қазақстандық футзал тарихындағы айтулы оқиғаға айналды. Айта кетейік, бұл – «Қайраттың» Чемпиондар лигасының финалына алғаш шығуы емес, 2013 және 2015 жылдары «Қайрат» Чемпион атанған еді.
Ал финалдағы қарсылас – испаниялық «Пальма» командасы жартылай финалда Португалияның әйгілі «Спортинг» клубын сенімді түрде – 3:0 есебімен ұтқан.
Үшінші орын үшін матч
Финалдан бөлек, сағат 20:00-де үшінші орын үшін матч өтеді. Онда жартылай финалда жеңілген екі команда – «Картахена» мен «Спортинг» өзара кездеседі. Бұл матчты да Qazsport арнасы тікелей эфирде ұсынады.
